Karungut

PARAWEI MAHAGA LINGKUNGAN

Tabe salamat lingu nalatai

Akan kakare kula handiai

Mina mama pangantai urai

Andi dan kaka sahabat mambai

Balaku ampun baribu-ribu

Akan kakare panyeneh lagu

Dewan juri jadi manunggu

Manilai karungut kalunen aku

Hanjak tutu angat pangkeme

Dewan juri tege munduk baun hete

Kumi marium hayak tatawe

Manggau je pantas juara ije

Hajamban riwut bahing suara

Ikei marawei kare tundah kula

Kelestarian lingkungan sama mahaga

Panatau panuhan bara usang nuha

Petak, danum, padang kayu himba

Kare lauk banta metu satua

Ela baya ingguna tapi haga kea

Jete panatau paham barega

Himba tutu paham baguna

Tau mangurang polusi udara

Eka melai metu satua

Tuntang eka itah satiar usaha

Akan pahari je malauk mambanta

Ela manuwe kare sungei saka

Tuntang ela manyentrum kea

Awi jete paham ingahana

Manyentrum manuwe te tundah kula

Tau lauk lumat dia batisa

Inekap polisi tame panjara

Manampa kasusah akan keluarga

Akan pahari je malan manana

Ela barangai neweng kayu himba

Bua-buah manusul tana

Ela sampai layap darat baseha

Amun lepah layap padang kayu himba

Jatun eka melai metu satua

Kabut asep manampa bahaya

Peres panyakit marajalela

Keleh mahaga adat budaya

Ayun tatu hiang bara usang nuha

Amun jadi malan manana

Imbul, uei, gita, mangkahai nangka

Tagal iyoh kula jalahan

Keleh itah sama mahaga lingkungan

Awi jete akan jadi warisan

Akan anak esu andau harian

Amun puna utus dayak bauhat

Ayo himbing lenge itah hapakat

Mahaga himba dengan tekad bulat

Mangat pambelum sanang salamat

Ayo pahari ungkup karabat

Keleh tuh itah belum hapakat

Namunan tungket je manggatang bahat

Mahaga lingkungan kalute niat

Tende helu tandak karungut

Hayak pahiau je suling riwut

Ampun maaf auhku hadurut

Amun tege sala kutak inyewut

Tikas tuh helu sarita ingumang

Ampun maaf aku pangarang

Jakai auhku je tapas kurang

Balaku pahari tau mandahang